Wiehnachtsboom schmücken

Lüt Ove (3) seggt: „Opa, de Wienachtsboom is noch buten. Mutst du fix inne Stuv haln“. Dammich ja, heff ik ganz vergeten bi den ganzen Umrasch. Avers rinholen is nich so eenfach, dat gütt buten. To Wiehnachten nich blos keen Schnee, een richtigen Schuur geit op me dahl.

So, nu steiht dat goode Stück inn’e Stuuv. Brigitte schimpt: „Hest du keen Deek ünnerlegt??“. Dannenboom wedder rut, Plastikdeek ut den Keller, Boom wedder rin – nu bün ik natt as’n Katt. Den Boom in den Patentstänner – sall piel oprecht stahn. Deit he nich. Met de Saag wat abfiedeln, naja, geit so. Nu de Wiehnachtsaaken vun Böhn dahl schleepen.

Lütt Kerrin (6) seggt: „Opa, kannst mi opbörn, ik will den Engel op de Tip setten.“ Lütt Ove kreit: „Dit Johr bün ik an’e Reeg, nu, wo ik in de Kita-Gruppe mit de Grooten bün.“ Wat schall ik dohn, Lütt Kerrin ward bi langem bannig schwoor. Ik segg: „Ove, du kannst de lütten hölten Figuren in den Boom hangen. Un din Süster Marlie hangt die gülden Keeden op, de mach se doch so gern.“ Lütt Ove grummelt, man he langt sik de Schachtel met de Figurn her un fummelt de Engels und Peer und Dwargen mang de Twiegen. Seggt Bantje (8): „Opa, wo sünt denn de Lichter? De antosteeken is doch min Saak.“

Wo weern de dor verdreihte Lichter bleeven? Op’n Böhn weern se nich. Ah, ik harr doch letzt Johr in’n Januar för’n Appel un Ei niege LED-Lichter köfft. Man, wo heff ik de hindahn? Brigitte seggt: „Hest du all in’n Kleederschapp nah keeken?“ „What schalln de denn dor bin?“ „Weet ik, wat du in’n Kopp hat hest?“.

So, de Lichter heff ik in’t Schapp funn’n. Bantje, Ove un Marlie befaten sik met jer Opgaaven. „Dor schall min lüttje Peerd hen.“ „Dor schall avers min Keed hen.“ „Dor schall avers min Licht hen.“ Dat gifft Krawall …

Jellef (12) süht in de Dör rin un seggt: “Dor is jo gorkeen Platz mehr för de Kugeln, wat schall ik nu dohn?“ Opa seggt: „De Boom is groot nog, Jellef. Oh, kiek mol, ik heff dat Lametta wedder funn’n. Dat hangt we noch in den Boom, denn is dat so as fröher bi mi to Huus.“ Alle goht op mi dahl: „Dat deist du nich, Lametta is mega uncool !!! Schmiet dat ole Tüch blots in‘e! Tünn!“

Op letzt het allens sin Platz und Wiehnachten is dor. Stille Nacht …