Geiht blos noch in’t Internet

Dat met de Computeree is gornich so licht. Nu hest du een niegen Reekner or Computer op’n Disch stahn un schast met umgohn. Dor is veel to liernen met dat Betriebssystem un de Programme. De PCs, de „persöhnlichen Computers“ gifft dat eerst siet so bi 1976. Vörher weern de Reekners meist groot as so’n Stuv, nu is dat so’n lütten Kassn op’n Disch. Kunnst dormit schrieven un reeken un wat nich allens. Eerst weern se bannich düer, denn warr dat jümmers billiger. Eerst weer dat mehr so’n Schrievmaschin. Denn geev dat meer un meer Programme, kunnst teeknen, annere Lüüd met Email Breeve schrieven …

Denn keem dat Internet opto, un allens worr anners. Vörher kunnst du Borgeld in Geldschiene von’ne Sporkasse halen un in din Kniep steeken. Por Johr laater kreegst du so’n Kord ut Plastik un kunnst dormet bi’n Höker din Inköpen betahlen. Per Postbreev kreegst du Auszüge, dor stunn op, weveel du noch op’e Kasse harrst. Wenn du dormals wat weeten wullt, mutst to de Sporkasse gohn un een vun de Beamte frogen.

Dat güng so’n Tid, denn kem ‘n Breev vun de Sporkass or de Bank: „Wir stellen auf Internet um, willkommen. Die Filiale in Ihrer Nähe müssen wir daher leider schliessen.“

Dat geiht doch gornich, schimpst du. Weetst ja nich, wo dat goon schall met dat Internet. Hest viellicht ok gorkeen Computer, bruukst avers nu een.

Kümmt wedder Post, nu vun de Post sülmst: „Wir stellen die Postbeförderung ein, da wir Ihre Briefe nur noch als Email akzeptieren können.“ Dammich ok. Wo geiht dat met disse Emails?

Röppt een Fründ vun woanners an: „Weetst du, ik heff nu Internet. Nu bruuk ik keen Breeve mehr op Popeer schrieven. Kannst mi bi WhatsApp wat schrieven. Or per Skype met mi schnacken – kannst mi dorbi sogor inn’e Oogen kieken. Fein, nich?“ Dammich ok. Wo geiht dat met disse Mumpitz?

Das Finanzamt schrifft di: „Wir haben auf das elektronische Programm Elster umgestellt. Ihre Steuererklärung nehmen wir nur noch über das Internet an.“

Markst wat? Nu sitst du to.