De Wiehnachtstern

„Dor hett sick to dormaliger Tied ergeven, dat een Gebot vun Kaiser Augustus utgüng, dat elk een sick inschrieven laten muss…“. So fung dat met de Wiehnachtsgeschicht an. Maria un Josef gungen na Bethlehem, mussen in’n Stall övernachten und Maria kreeg eer Kind. Un denn stunn dor een Stiern över den Stall un de dree Könige keemen an, lütt Jesus to fieern un to beschenken…. Weet wi doch all lang, harrn Matthäus un Lukas doch dormals obschreven.

Man, wo weer dat met den dorigen Stiern? Matthäus schrev, dat de Stiern dormals över den Himmel lopen de un över den Stall stahn blev. Avers dat givt dat doch gornich! ’N Stiern steiht fast an Heben un löpt nich eenfach rüm.

Or doch? In Middelöller hebbt de Lüüd dacht, de Stiern weer’n Komet west. Man een Komet weer fröer to alle Tieden een leegen Mallör-bringer. Passt nich to een Freudenböskup. Dor möt we anners bi!

Fru Hoffmann, een Astronomin, het mi wat dorto vertellt. Se seggt, dat to de Tied vun Augustus um un bi dat Johr 1 de Astrologen veel to seggen harrn. So weer de Jupiter de Planet vun den Kaiser. In de Johren 2 un 3 vör unse Tied (BC) weer de Jupiter an Heven tweemal üm den Regulus rüm lopen. Regulus weer vun öllers her de „Königsstiern“ un wenn de Kaiserplanet üm den Königsstiern rümlöpt, mut dat wat dulles bedüden. Wenn denn noch de Venus dorto kümmt, de God-Mudder vun Augustus sien Familie, denn is richtig wat los! Denn lücht an’n Heven een Füerwark as dat blots geiht! To de glieke Tied wurr noch de Pax Augusta fiert, 30 Johr Freeden (för Rom!). Dat weer den 17. Juni 02 BC. Augustus leet sik as „Licht der Welt“ un „Friedefürst“ fiern – na, markst wat? Sowat hebt wi doch all mol in’ne Kark vun Jesus hört.

Een beteres Johr un een feineres Teeken an Heben för de Retter of de Minschen kannst meist nich hebben. Dat maakt denn ok nix, dat sin Geburt nich akkerat an Wiehnachten weer sünner meern in Sommer. Dat Datum hebt de laater Kaisers anners hen schuvt, wiel dat beeter to jer Fier of dat „Licht der Welt“ (Sol Invictus) passen dee.

Op letzt noch de Saak met de hilligen dree Könige. As de vun Jerusalem na Bethlehem wannelten, süh, dor leepen Jupiter un Venus jem as Wiesfüer vöran – wiel de Eer sik dreiht.